طاجين المثوم بطريقة جديدة

المرة هادي جبتلكم وصفة بالعدس لكن لما تذوقوها كونوا متأكدين أنكم مش رايحين تتذوقو طعم العدس أبدا طعمو يتبدل تماما ويصير أحلى كأنه لحم أو دجاج


أولا
تجيبي العدس ديريه في الماء والقليل من الملح وتخليه فوق النار دقائق وامبعد تنحيه وتخليه يبرد في الماء نتاعو ولما يبرد اضغطي عليه بايديك باش تتنح القشرة نتاعو وصفيه من القشور(ارمي القشور) وعاودي حتى تتخلصي من القشور تماما ويصير العدس هش شوية وبلا قشور
ويعني أغسليه مليح

بعدها روحي جيبي مهراس ودقيه حتى يصير مهروس مليح


بعدها وجدي التتبيلة
-رابي حبة بصلة كبيرة
-فصوص ثوم
-والكثير من الكسبر مقطع رقيق
-والزنجبيل والفلفل الاسود والملح
-وبيضة
-وملعقين ولا ثلاثة(حسب الكمية)شابلور ولا فرينة

يعني كأنك تخدمي في السفيرية بعد ما ادقي كل العدس خلطيه مع المكونات لي فاتت مليح


بعدها ديريه كويرات واضغطي عليه مليح بعدها غطسيه في البيض..ثم في لاشابلورثم اقليه ولما تقليه مباشرة حطيهم في لاسوس تومات لي تكوني وجدتيها من قبل.. كما في الصور


وفي هذا الوقت تكوني وجدتي لاصوص طوماط المعروفة

ثوم+كسبر+ جزر مقطع دوائر+ قطع لحم ولا دجاج(إختياري مش شرط )+ ملح + كمون+ فلفل أحمر+ حبات طماطم مرابية + رند+ شوية حمص وزيت فوق النار حتى يذبلوا كامل ثم أضيفي الماء والطماطم المصبرة
في الأخير حتى تصير خاثرة..





بعدها حطيها في صحن اذا حبيتي اقلي معها البطاطا