جريوش على الطريقة التقليدية

المقادير

- 500 غ فرينة ( انا عبرت بعلبة المارغرين نتاع 500 غ نتال لابال )
- ½ كاس نتاع ليدام دافئة أي زبدة مذابة + زيت( هنا كثري زبدة كثر من زيت )
- 2 مغرف صغيرة سكر
- 1 مغرف صغيرة خميرة الخبز
- ذرة ملح
- حبة بيض
- ذرة زعفران بودرة
- مغرف صغيرة خل
- ماء الزهر

التحضير
- في اناء ندير فرينة و نضيفلها الخميرة + الملح + سكر و نخلط الكل من بعد نبسسها بليدام لازم يكون دافي مانعجنش برك ندخل ليدام في العجينة
-من بعد ندي صحن ندير فيه حبة بيض + خل+ زعفران و نضربوه شوية بالشوكة من بعد نضيفوه على الفرينة و نخلط الكل و نبدا نضيف الماء الزهر غير بالشوية حتى تتلم العجينة
- نقسمها على 4 كرات و نغطيها بكيس بلاستيكي و نخليها على جهة ترتاح مدة 15 د
- كي ترتاح ندي الحلال و نحل العجينة 1 ملم في سمك ماتكون رقيقة بزاف ولا خشينة من بعد نشكل حبات جريوش و نستفهم في صينية بالترتيب باش كي نروح نقليها نقليها بالترتيب و نغطي على العجينة كي نكون نشكل فيها هكا باش ماتنشفش و تشكل معانا قشرة
- من بعد نسخن الزيت و نبدا نقلي الحبات نخليها في كسكاس تقطر من بعد نعسلها و نزينها بحبات جلجلان انا هنا مدرتوش لان في دار مايحبوهش
و تقدم بالصحة و الراحة
اليكم صور و معذرة لاني ماصورتش المقادير مع الاول