السلام عليكم نظرا لطلبات الاخوات فيما يخص مراحل عمل البادنجان المحشي بالجبن راني عاودت عملتو وصورت المراحل بالتفصيل وزدت عمل اضافة من عندي وهي بادنجان سيجار بطريقة جديدة وبشكل جديد نتمنى يعجبكم
هاد المرة قليت البادنجان قبل مانحشيه وجا المداق خير من اللي عملتو المرة السابقة في الفرن
المهم نخليكم مع الصور ونتمنى تجربوه لانو فعلا رائع ويصلح للعرضات والعزومات انا عملتو للغدا مع سلاطة وبطاطا مقلية واي استفسار انا في الخدمة
ماتنساوش تعطوني رايكم راني نستنى
المكونات
بادنجان +فروماج وممكن تتعملي لحم مفروم في مكانو +بيضة مخفوقة+فرينة+خبز مرحي او شلبلير+زيت للقلي
اولا تنقي البادنجان وتقطعيه شرائح متوسطة عدليها بالسكين حتى تولي كل شريحتين من نفس الشكل والحجم ترشيها بالملح وتخليها 5د حتى تطلق الماء تنشفيها منو بورق ماص
تقليها في الزيت من غير ماتتحمر وتحطيها على ورق ماص حتى تبرد
تاخدي شريحة تحطي فيها قطعة من الفوماج انا بصراحة كل اطباقي نستعمل فيها جبن باربار فعلا روعة او تحطي حربوش من اللحم المفروم حسب الرغبة وترولي حتى يولي شكل سيجار
مرغديه في الفرينة مليح خاصة الجوانب
ثم في البيضة المخفوقة مع شوية ملح
ثم في الشابلير
او ديري طبقة من الجبن او اللحم المفروم فوق شريحة البادنجان
غطيها بشريحة تانية من البادنجان
مرغديها في الفرينة ثم البيض ثم الشابلير
اقليهم في زيت غزيرة وحطيهم مباشرة فوق الورق الماص
موضوع: جديد بادنجان سيجار رولي وفارسي+اعادة للبادنجان المحشي 